(1)
શ્રી શુભવિજય સુગુરુ નમી, નમી પદ્માવતીમાય ;
ભવ સત્તાવીશ વર્ણવું, સુણતાં સમકિત થાય.. 1
સમકિત પામે જીવને, ભવ ગણતીએ ગણાય ;
જો વલી સંસારે ભમે, તો પણ મુગતે જાય… 2
વીર જિનેશ્વર સાહેબો, ભમિયો કાળ અનંત ;
પણ સમકિત પામ્યા પછી, અંતે થયા અરિહંત.. 3
(ઢાળ – પહેલી)
પહેલે ભવે એક ગામનો રે, રાય નામે નયસાર ;
કાષ્ટ લેવા અટવી ગયો રે, ભોજનવેળા થાય રે,
પ્રાણી ! ધરિયે સમકિત રંગ, જિમ પામીયે સુખ અભંગ રે…
પ્રાણી ! ધરિયે સમકિત રંગ… 1
મન ચિત્તે મહિમાનલો રે, આવે તપસી કોય ;
દાન દેઇ ભોજન કરું રે, તો વાંછિત ફળ હોય રે… પ્રાણી …2
મારગ દેખી મુનિવરા રે, વંદે દેઇ ઉપયોગ ;
પૂછે કેમ ભટકો ઇહાં રે ? મુનિ કહે સાર્થવિયોગ રે.. પ્રાણી…3
હરખભેર તેડી ગયો રે, પડિલાભ્યા મુનિરાજ ;
ભોજન કરી કહે ચાલીએ રે, સાર્થ ભેળા કરું આજ રે…પ્રાણી..4
પગવટીયે ભેળા કર્યાં રે, કહે મુનિ દ્રવ્ય એ માર્ગ ;
સંસારે ભૂલા ભમો રે, ભાવ મારગ અપવર્ગ રે… પ્રાણી…5
દેવ- ગુરુ ઓળખાવિયાં રે, દીધો વિધિ નવકાર ;
પશ્ચિમ મહાવિદેહમાં રે, પામ્યો સમકિત સાર રે…. પ્રાણી… 6
શુભધ્યાને મરી સુર હુઓ રે, પહેલા સ્વર્ગ મોઝાર ;
પલ્યોપમ આયુ ચ્યવી રે, ભરત ઘરે અવતાર રે.. પ્રાણી….7
નામે મરીચિ યૌવને રે, સંયમ લીયે પ્રભુ પાસ ;
દુષ્કર ચરણ લહી થયો રે, ત્રિદંડિક શુભ વાસ રે… પ્રાણી…8
(ઢાળ – બીજી)
નવો વેષ રચે તેણી વેળા, વિચરે આદીશ્વર ભેળા,
જળ થોડે સ્નાન વિશેષે પગ પાવડી ભગવે વેષે… 1
ધરે ત્રિદંડ લાકડી મ્હોટી, શિર મુંડણ ને ધરે ચોટી ;
વળી છત્ર વિલેપન અંગે, થૂલથી વ્રત ઘરતો રંગે…2
સોનાની જનોઇ રાખે, સહુને મુનિમારગ ભાખે ;
સમોસરણે પૂછે નરેશ, કોઇ આગે હોશે જિનેશ… 3
જિન જંપે ભરતને તામ, તુજ પુત્ર મરિચિ નામ ;
વીર નામે થશે જિન છેલ્લા, આ ભરતે વાસુદેવ પહેલા….4
ચક્રવર્તિ વિદેહે થાશે, સુણી આવ્યા ભરત ઉલ્લાસે ;
મરિચિને પ્રદક્ષિણા દેતા નમી વંદીને એમ કહેતા….5
તમે પુન્યાઇવંત ગવાશો, હરિ – ચક્રી – ચરમજિન થાશો;
નવિ વંદું ત્રિદંડિક વેષ, નમું ભક્તિયે વીરજિનેશ… 6
એમ સ્તવના કરી ઘર જાવે, મરિચિ મન હર્ષ ન માવે ;
મ્હારે ત્રણ પદવીની છાપ, દાદા જિન ચક્રી બાપ…7
અમે વાસુદેવ ધુર થઇશું, કુલ ઉત્તમ મ્હારું કહીશું ;
નાચે કુળમદશું ભરાણો, નીચગોત્ર તિહાં બંધાણો..8
એક દિન તનુ રોગે વ્યાપે, કોઇ સાધુ પાણી ન આપે ;
ત્યારે વંછે ચેલો એક, તવ મળિયો કપિલ અવિવેક…9
દેશના સુણી દીક્ષા વાસે , કહે મરિચિ લીધો પ્રભુ પાસે ;
રાજપુત્ર કહે તુમ પાસે, લેશું અમે દીક્ષા ઉલ્લાસે…10
તુમ દરશને ધરમનો વ્હેમ, સુણી ચિંતે મરિચિ એમ ;
મુજ યોગ્ય મળ્યો એ ચેલો, મૂળ કડવે કડવો વેલો… 11
મરિચિ કહે ધર્મ ઉભયમાં , લીયે દીક્ષા યૌવન વયમાં ;
એણે વચને વધ્યો સંસાર, એ ત્રીજો કહ્યો અવતાર ….12
લાખ ચોરાશી પૂરવ આય, પાળી પાંચમે સ્વર્ગે સિધાય ;
દશ સાગર જીવિત ત્યાંહી, શુભવીર સદા સુખમાંહી…13
(ઢાળ – ત્રીજી)
પાંચમે ભવ કોલ્લાગસન્નિવેશ, કૌશિક નામે બ્રાહ્મણ વેષ ;
એંશી લાખ પૂરવ અનુસરી, ત્રિદંડીયાને વેષે મરી… 1
કાલ બહુ ભમીયો સંસાર, થુણાપુરી છઠ્ઠો અવતાર ;
બહોંતેર લાખ પૂરવને આય, વિપ્ર ત્રિદંડી વેષ ધરાય. …2
સૌધર્મે મધ્યસ્થિતિએ થયો, આઠમે ચૈત્ય સન્નિવેષે ગયો ;
અગ્નિદ્યોત દ્વિજ ત્રિદંડીયો, પૂર્વ આયુ લાખ સાઠે મૂઓ… 3
મધ્યસ્થિતિએ સુર સ્વર્ગ ઇશાન, દશમે મંદિરપુર દ્વિજઠાણ ;
લાખ છપ્પન પૂર વાયુ ધરી, અગ્નિભૂતિ ત્રિદંડીક મરી…. 4
ત્રીજે સરગે મધ્યાયુ ધરી, બારમે ભવે શ્વેતાંબીપુરી ;
પૂરવલાખ ચુમ્માળીશ આય, ભારદ્વિજ ત્રિદંડીક થાય….5
તેરમે ચોથે સ્વર્ગે રમી, કાળ ઘણો સંસારે ભમી ;
ચઉદમે ભવ રાજગૃહી જાય, ચોત્રીશલાખ પૂરવનું આય… 6
થાવર વિપ્ર ત્રિદંડી થયો, પાંચમે સ્વર્ગે મરીને ગયો ;
સોળમે ભવ ક્રોડ વરસનું આય, રાજકુમાર વિશ્વભૂતિ થાય… 7
સંભૂતિમુનિ પાસે અણગાર, દુષ્કરતપ કરી વરસહજાર ;
માસખમણ પારણે ધરી દયા, મથુરામાં ગોચરીએ ગયા… 8
ગાયે હણ્યા મુનિ પડીયા વસા, વિશાખાનંદી પિત્તરિયા હસ્યા ;
ગૌશૃંગે મુનિ ગરવે કરી, ગયણ ઉછાળી ધરતી ધરી… 9
તપ બળથી હોજો બળ ધણી, કરી નિયાણું મુનિ અણસાણી ;
સત્તરમે મહાશુક્રે સુરા, શ્રી શુભવીર સત્તરસાગરા…. 10
(ઢાળ – ચોથી)
અઢારમે ભવે સાત, સુપન સૂચિતસતી ,
પોતન પૂરીયે પ્રજાપતિ રાણી મૃગાવતી ;
તસ સુત નામે ત્રિપૃષ્ઠ, વાસુદેવ નીપન્યા ,
પાપ ઘણું કરી, સાતમી નરકે ઉપન્યા. 1
વીશમે ભવ થઇ સિંહ, ચોથી નરકે ગયા,
તિંહાથી ચવી સંસારે, ભવ બહુલાં થયા ;
બાવીશમે નરભવ લહી, પુણ્ય દશા વર્યા,
ત્રેવીશમેં રાજધાની, મૂકાએ સંચર્યા. 2
રાયધનંજય ધારણીરાણીએ જનમિયા,
લાખચોરાશી પૂરવ આયુ જીવિઆ ;
પ્રિયમિત્ર નામે ચક્રવર્તી દીક્ષા લહી,
કોડી વરસ ચારિત્રદશા પાળી સહી…3
મહાશુક્રે થઇ દેવ ઇણે ભરતે ચ્યવી,
છત્રિકા નગરીયે જિતશત્રુ રાજવી ;
ભદ્રામાય લખ પચવીશ વરસ સ્થિતિ ધરી,
નંદનનામે પુત્રે દીક્ષા આચરી…. 4
અગીયાર લાખને એંશી હજાર છસ્સેં વળી,
ઉપર પિસ્તાળીશ અધિક પણ દિન રુળી ;
વીશ સ્થાનક માસખમણે, જાવજ્જીવ સાધતા,
તિર્થંકર નામ કર્મ તિહાં નિકાચતા…5
લાખ વરસ દીક્ષા પર્યાય તે પાળતા,
છવ્વીશમે ભવ પ્રાણતકલ્પે દેવતા ;
સાગર વીશનું જીવિત સુખભર ભોગવે,
શ્રી શુભવીર જિનેશ્વર ભવ સુણજો હવે…6
(ઢાળ – પાંચમી)
નયર માહણકુંડમાં વસે રે, મહાઋદ્ધિ ઋષભદત્ત નામ;
દેવાનંદા દ્વિજ શ્રાવિકા રે, પેટ લીધો પ્રભુ વિસરામ રે,
પેટ લીધો પ્રભુ વિસરામ…1
બ્યાશી દિવસને અંતરે રે, સુરહરિણગમેષી આય;
સિદ્ધારથરાજા ઘરે રે, ત્રિશલાકૂખે છટકાય રે… 2
નવમાસાંતરે જનમીયા રે, દેવ – દેવીયે ઓચ્છવ કીધ ;
પરણી યશોદા યૌવને રે, નામે મહાવીર પ્રસિદ્ધ રે… 3
સંસારલીલા ભોગવી રે, ત્રીશવર્ષે દીક્ષા લીધ ;
બાર વરસે હુઆ કેવળી રે, શિવવહુનું તિલક શિર દીધ રે… 4
સંઘ ચતુર્વિધ થાપીયો રે, દેવાનંદા – ઋષભદત્ત પ્યાર ;
સંયમ દેઇ શિવ મોકલ્યાં રે, ભગવતીસૂત્રે અધિકાર રે.. 5
ચોત્રીશ અતિશય શોભતા રે, સાથે ચઉદસસહસ અણગાર,
છત્રીસસહસ તે સાધવી રે, બીજો દેવ – દેવી પરિવાર રે….6
ત્રીશ વરસ પ્રભુ કેવળી રે, ગામ – નગર તે પાવન કીધ ;
બહોંતેરવરસનું આઉખું રે, દિવાળીયે શિવપદ લીધ રે… 7
અગુરુલઘુ અવગાહને રે, કીધો સાદિ – અનંત નિવાસ ;
મોહરાયમલ્લ મૂળશું રે, તન – મન સુખનો હોય નાશ રે.. 8
તુમ સુખ એકપ્રદેશનું રે, નવિ માવે લોકાકાશ ;
તો અમને સુખીયા કરો રે, અમે ધરીયે તુમારી આશ રે… 9
અક્ષય ખજાનો નાથનો રે, મેં દીઠો ગુરુ ઉપદેશ ;
લાલચ લાગી સાહેબા રે, નવિ ભજીયે કુમતિનો લેશ રે… 10
મ્હોટાનો જે આશરો રે, તેથી પામીયે લીલ વિલાસ ;
દ્રવ્ય – ભાવ શત્રુ હણી રે, શુભવીર સદા સુખવાસ રે… 11
।। કળશ ।।
ઓગણીશ એકે વરસ છેકે, પૂર્ણિમા શ્રાવણ વરો ;
મેં થુણ્યો લાયક વિશ્વનાયક, વર્ધમાન જિનેશ્વરો ,
સંવેગ રંગ તરંગ ઝીલે, જસ વિજય સમતા ધરો ;
શુભ વિજય પંડિત ચરણ સેવક વીરવિજયો જયકરો.. 1